ಬುಧವಾರ, ಅಕ್ಟೋಬರ್ 1, 2014

"ತಾಜಾ ಬೇಸಿಗೆಗೆ.."

    "ತಾಜಾ ಬೇಸಿಗೆಗೆ.."

ಗೂಡು ಕಟ್ಟಿದೆ ಕನಸ ಗುಂಗು
ಅದಕೂ ಕೂಡ ಈಗ ನಿನದೇ ರಂಗು
ತುತ್ತು ತರುವ ತಾಯಿ ಹಕ್ಕಿ
ಹಾರಬಯಸಿದೆ ತಾನು ಮುಗಿಲ ಹೆಗಲಿಗೂ..

ಮೂಡಿಹನು ಚಂದ್ರ ಚಾಮರದ ಜಾಡಿನಲಿ
ಹರವಿಟ್ಟ ಹರೆಯದ ಗರಿಗಳಾ ಹೆಕ್ಕಿ..
ಹಿಂದೊಮ್ಮೆ ಎಂದೋ ಅರಳಿದಾ ಕುಸುರಿಯಲಿ
ಕೊಸರಿಹುದು ಗೆರೆಯು ಕಾರಣವ ಹುಡುಕಿ..

ನಮ್ಮಿಬ್ಬರಾ ನಡುವೆ ನುಸುಳಿರಲು ತಂಗಾಳಿ
ತಂತಿಗಳ ಹರಿದಿತ್ತು ನಾಚಿಕೆಯ ಬೇಲಿ..
ಹೊಸದಾಗಿ ಹಾಗೇ ಹೂ ಬಿಡುವ ಹಂಬಲ
ಬಾಡಿದಾ ವಲ್ಲಿಗೆ ಸೋಕಿ ಹೊಸ ಪರಿಮಳ..

ಬಿಡಿ ನುಡಿಯ ಸರಕೆಲ್ಲ ಒತ್ತೊಟ್ಟಿಗೆ
ಬೇಕೇನು ಈ ಗಳಿಗೆ ಭಾವಾಂತರ..
ಕುಡಿ ಕುಡಿಯ ಸಂಗೀತ ಮನದಾಸೆಗೆ
ಹೂವಿಗೂ ಮುನ್ನ ಏನೋ ಮಧ್ಯಂತರ..

ಮೊಗ್ಗಿನಾ ಬಣ್ಣ ತುರುಬಿನಾ ತುದಿಗೆ
ಮೆರಗನ್ನು ಹಚ್ಚೀತೇ ಈ ತಾಜಾ ಬೇಸಿಗೆಗೆ..
ಸೆರೆಹಿಡಿದು ಕವಲ,ಹವೆಯಾಯ್ತು ಖಾಸಗಿ
ಸಂಕ್ರಮಣ ಬಂದಾಯ್ತು ಸದ್ಯದಾ ಋತುವಿಗೆ..

                                               ~‘ಶ್ರೀ’
                                                   ತಲಗೇರಿ

1 ಕಾಮೆಂಟ್‌: