ಬುಧವಾರ, ಅಕ್ಟೋಬರ್ 22, 2014

"ಜೀವನ್ಮುಖಿ..."

            "ಜೀವನ್ಮುಖಿ..."

ವಿರಾಗಿಯ ಬಗಲಲ್ಲಿ ಜೋಳಿಗೆಯ ಪರಿಭಾಷೆ
ಕರಗದಿರುವ ನೆರಳಿಗೂ ಬೆರಳಿನಾ ಆಸೆ..
ಸಾರಿಗೆಯ ರಹದಾರಿ ಬಿಸಿಲಿನಾ ಪಿಸುಮಾತು
ಹಾಸಿಹುದು ಕಡುಗಪ್ಪು ಮೌನವೂ ಬೆರೆತು..

ಮಿಥ್ಯ ಸಂಜೆಯಲಿ ಚಂದಿರನ ಹೆಣವು
ಸಿಕ್ಕು ಸಿಕ್ಕಾದ ಶೃಂಗಾರಕೆ ತಾರೆಗಳ ಮೊಗ್ಗು..
ತಥ್ಯ ತೀಟೆಯಲಿ ಮುಗಿಲಿನಾ ಸೆಳವು
ಜಲಬಿಂದು ಜೋಡಿಕೆಗೂ ಬೆಳಕಿನಾ ಹಂಗು..

ಬೆಚ್ಚುತಿಹ ಬಣ್ಣಗಳ ಒಟ್ಟುಗೂಡಲಿಟ್ಟು
ಗುಟ್ಟಾಗಿ ಬರೆದಿರುವ ಚಿತ್ತಾರ ಬಾನು..
ಮುಂಚಿತವೇ ಮನೆಯ ಬಾಗಿಲನು ತೆರೆದಿಟ್ಟು
ಹೆಜ್ಜೆಗಳ ಸಲಿಗೆಯನು ಬಯಸಿಹೆನೇ ನಾನು!..

ಬೇಡಿಕೆಯ ಸೇರಿಕೆಗೆ ಯಂತ್ರಗಳ ಆಲಾಪ
ಕೀಲುಗಳ ಕದಲಿಕೆಗೆ ಪ್ರತಿಕ್ಷಣದ ಮಿಸುಕಾಟ..
ಬಾಡಿಗೆಯ ನಿದಿರೆಗೆ ರಾತ್ರಿಯಾ ಸಂತಾಪ
ನೂಲುಗಳ ಪೋಣಿಕೆಗೆ ಕನಸುಗಳ ತಡಕಾಟ..

ಇಂದ್ರಿಯದ ನರುಗಂಪು ಭ್ರಮೆಗಳಾ ಬೀದಿ
ಹವೆಯ ಪ್ರಾಯ ಹಾಗೇ ಏರುತಿರಲು..
ಕಣ್ಣೆವೆಗೆ ನಿಲುಕೀತು ವಾಸ್ತವದ ಪರಿಧಿ
ಬಲಿತ ರೆಕ್ಕೆಗೆ ಒಂದು ದಿಕ್ಕು ಕೊಡಲು..

                              ~‘ಶ್ರೀ’
                               ತಲಗೇರಿ

1 ಕಾಮೆಂಟ್‌: