"ಸಂತೆಯ ಸೋಗಿಗಿಲ್ಲಿ..."

   "ಸಂತೆಯ ಸೋಗಿಗಿಲ್ಲಿ..."

ಹಕ್ಕಿ ಹಚ್ಚಿಹುದು ನನ್ನೆದೆಗೆ ರೆಕ್ಕೆಗಳ
ಹುಡುಕಿಹೆನು ಮತ್ತೆ ಭ್ರಮೆಗಳಾ ಬರಿಗಾಲು
ತಟ್ಟಿ ಎಬ್ಬಿಸಲೇ ನಕ್ಷತ್ರ ನೆರಳುಗಳ
ದಿಕ್ಕುಗಳ ದಾಖಲೆಗೆ ಚುಕ್ಕಿಗಳ ಸಾಲು..

ಮಬ್ಬಾದ ಹವೆಯ ಹರೆಯದಾ ಚಾಳಿ
ಬೇಕೇನು ಕಾಲುದಾರಿಗೆ ಸಣ್ಣ ರೂಪಾಂತರ
ದಿಬ್ಬಣದ ಸಂಭ್ರಮ ಭ್ರಮರದಾ ಪಾಳಿ
ಮೊಗ್ಗಾಯ್ತು ಮನದೊಳಗೆ ಸ್ಪರ್ಶದಾ ಪ್ರವರ..

ಕತ್ತಲೆಗೆ ಕಾಡೀತು ಬೆಳಕಿನಾ ಅಮಲು
ಜೋಪಡಿಯ ಜಗುಲಿಯಲಿ ಸ್ವಪ್ನಗಳ ಸಾಕಲು..
ನಿಂತಿರಲು ಎದುರು ಭೂಮಿಕೆಯ ಹಗಲು
ಕರಗಿರುವ ಇಬ್ಬನಿಗೆ ತಾ ಕೊರಗೀತೇ ಬಿಸಿಲು..

ಸುಕ್ಕುಗಳ ಪುರವಣಿಗೆ ಬೇಕೇನು ಅನುವಾದ
ಅಕ್ಷರದ ಸಂಚಿಯಲಿ ಹಲವು ಮುಖಗಳು..
ಬೇಕುಗಳ ಜಾತ್ರೆಯಲಿ ಹರಡಿರುವ ಭವನಾದ
ಮಂದ್ರದಲಿ ಕರೆದಿಹುದು ಆಟಿಕೆಯ ಕೊರಳು..

ಅರಸುತ್ತ ಹರವಿನಲಿ ಶಾಪ ಕರಗಿದ ಗೂಡು
ಪರಿಧಿಗಳ ಪರಿಧಿಯನು ಮೀರಬಲ್ಲದೇ ಹಕ್ಕಿ..
ಸಂತೆಯ ಸೋಗಿಗಿಲ್ಲಿ ತಿದ್ದಬೇಕಿದೆ ಕರಡು
ಅರಿವಿರದೆ ಬರೆದಿಟ್ಟ ರೂಪಕವ ಹುಡುಕಿ..

                                          ~‘ಶ್ರೀ’
                                             ತಲಗೇರಿ