"ಆ ತಂಗಿಗೆ"....
ಬರೆವ ಬಿಳಿ ಹಾಳೆಯ ಮೇಲೆ
ನಿನ್ನ ಸಹಿಯ ಮೆರವಣಿಗೆ!
ಬಿರಿದ ನನ್ನೆದೆಯ ತುಂಬ
ನಿನ್ನದೇ ನೆನಪುಗಳ ಹಳೆ ನಡಿಗೆ...
ಅಳಿಯಲಿಲ್ಲ ಅಳೆದುಹೋದ
ಬೃಂದಾವನದ ಪರಿಮಳ
ಕಳೆಯಲಿಲ್ಲ ತಳೆದುಹೋದ
ಮನಸುಗಳ ನಿಜ ತಳಮಳ
ಅಳುವ ಕಂಗಳ ಅಂಚ ತುಂಬ
ಸುಳಿಯುತಿವೆ ಅವಳ ಬಿಂಬ
ಬಿಳಿಯ ಬದುಕಿಗೆ ಬಣ್ಣ ಬಳಿದು
ನಲಿಯಬೇಕೇ ಕನಸು ಎಂದು?
ಕಟ್ಟಿದಾ ಗೂಡೊಳಗೆ ಹಕ್ಕಿಯಿಲ್ಲ
ಗೂಡು ಇನ್ನು ಜಂಟಿಯಲ್ಲ!
ಬೆಳಕಿಲ್ಲದಾ ಅರಮನೆಯ ಪಾಡು
ಸ್ವರವಿರದೆ ಸತ್ತಿದೆ ಗೂಡಿನಾ ಹಾಡು!
ಸೂತಕದ ಮೌನದ ಸದ್ದಿಗಿಂತ
ಸಾವಿರ ಸಾವಿನಾ ಜಿದ್ದೇ ಚೆಂದ!
ಪ್ರೀತಿಯಾ ಪರಿಧಿಯಾ ಬೇಲಿಯಲ್ಲಿ
ಅರಳಿ ಮಿಡಿಯಲಿ ಭ್ರಾತೃ ಬಂಧ!!...
~‘ಶ್ರೀ’
ತಲಗೇರಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ