"ವ್ಯಕ್ತ.."

   "ವ್ಯಕ್ತ.."

ಕರಿಯ ಸರಳುಗಳ
ಪುಟ್ಟ ಗೂಡಲಿ
ತಟ್ಟಿ ಮಲಗಿಸಿರುವ
ಹಕ್ಕಿ ನಾನು..
ಸಲಹೋ ಬೆರಳಿನ
ಮಮತೆ ಪ್ರೀತಿ
ಹಚ್ಚಿಕೊಂಡಿಹ ರೀತಿ..
ಆದರೂ ರೆಕ್ಕೆ ಬೀಸದಂತೆ
ಗಾಳಿಗೊರಗದಂತೆ
ತಡೆದ ಜಾಲ
ಈ ಕುರುಡು ಶಾಪ..

ಅತ್ತ ಚಿಗುರೆಲೆಯ
ತುದಿಗಳಾ ತೀಡಿ..
ಮನದುಂಬಿ ಭೂರಮೆಗೆ
ಜೋಗುಳವ ಹಾಡಿ..
ಕಸಕಡ್ಡಿಗಳ ಗೂಡಿನಲಿ
ನಿತ್ಯ ತೂಗಾಡಿ..
ಕಾಳು ಹೆಕ್ಕುವ ಕಾಡಹಕ್ಕಿಗೆ
ಬೇಟೆಗಾರನ ಹೆದರಿಕೆ..

ನಾಲ್ಕು ಗೋಡೆಯ ಮಧ್ಯ
ಅಳೆದಳೆದು ತೂಗಿ
ಹಣೆಬೊಟ್ಟು ಇಡುವ ಗರತಿ..
ಭಾಷೆಯಿದ್ದರೂ ಹಾಡಾಗದೆ
ಎದೆಯೊಳಗೇ ಬಿಕ್ಕಳಿಸುವ ಸ್ಥಿತಿ..
ಅಂದ ಸ್ವಚ್ಛಂದದಲಿ
ಬಣ್ಣ ಹೀರುವ ದುಂಬಿಯಾ
ಕಾಮ ದುಂದುಭಿ..
ಅಗಲ ಬಾನಿನ ಎಲ್ಲ ದಿಶೆಯಲೂ
ಹೊಂಚುಹಾಕುವ ‘ಬೇಡ ಬಾಣ’..

ಸ್ವಾತಂತ್ರ್ಯವಿದು..
ದೇಹಕ್ಕೋ..
ಇಲ್ಲಾ,ದೇಹಧಾರಿಗೋ..
ಬದುಕು..
ಒಳಗಿನಾ ಬೆರಗು..
ಹೊರಗಿನಾ ಸೋಗು...

                        ~‘ಶ್ರೀ’
                           ತಲಗೇರಿ