"ಸರಿದ ನೆರಳ ದಾರಿಯಲ್ಲಿ"...
ಮುಸುಕು ಕವಿದ ಇರುಳ ಸಮಯ
ನೋಡದಿರಿ ನನ್ನ ಮುಖವ ಇಣುಕಿ
ಉಸಿರ ಬಿಸಿಯ ತಣಿಸೋ ಹೃದಯ
ಕಾಡದಿರು ಮತ್ತೆ ನೆನಪ ಕೆದಕಿ...
ಚಂದ್ರನಿಲ್ಲ ಬಾನಿನಲ್ಲಿ
ಹಾಗೇ ನರಳಿದೆ ಕೊನೆಗೆ
ಸುಳಿದು ಕರಿಮೋಡ!
ಮಣ್ಣಕಣ್ಣ ಗುಂಗಿನಲ್ಲಿ
ನೋಟ ನೆರಳ ಬದಿಗೆ
ತೆಗೆದು ಮುಖವಾಡ!!..
ಉಳಿಯಲಿಲ್ಲ ದೀಪದಲ್ಲಿ
ಹಾರಿ ಉದುರಿದ ಮಿಡತೆ
ಉರಿದು ಬರಿಬೇಗೆ
ಬಣ್ಣಬಣ್ಣ ಸೋಗಿನಲ್ಲಿ
ಸಾವ ಬರೆದಿದೆ ಚರಿತೆ
ಬೆಳಕು ಅರಿವಾಗೆ!
ಸರಿದ ನೆರಳ ದಾರಿಯಲ್ಲಿ
ನಡೆವ ನಾನು ಅನಾಮಿಕ
ಗೆಳತಿ ನಿನ್ನ ಪ್ರೀತಿಯಲ್ಲಿ
ಸ್ಫುರಿತ ನಾ ಚೆಂದ ರೂಪಕ..
ಗುರುತಿಸಬಲ್ಲೆ ನೀನು ಮಾತ್ರ
ರಾಗಭರಿತ ನನ್ನ ಮೊಗವ
ಹೊಸೆಯಬಲ್ಲೆ ಹೊಸತು ಸೂತ್ರ
ಒಂದು ಮಾಡಿ ಕವಲು ಕವಲು ಭಾವ..!
~‘ಶ್ರೀ’
ತಲಗೇರಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ