ಭೃಂಗದ ಬೆನ್ನೇರಿ...
ಕಿರಣಗಳು ಮೈಯ ಬಳಸೆ
ಸ್ಫುರಿಸಿತೊಲವ ಹೂವ ಮಂದಹಾಸ
ಮರಣಗಳು ನಾಳೆಯಳಿಸೆ
ತೆರೆದುಕೊಳ್ಳಲಿ ಜೀವ ಭಾವಕೋಶ...
ಭೃಂಗದ ಬೆನ್ನೇರಿ
ಬೆರೆವ ಗಂಧದ ಹಾಡು
ಶೃಂಗದ ಗರಿಯಾಗಿ
ಕರೆವ ಶೂನ್ಯದ ತೇರು!
ನಿನ್ನೆಯ ಸುಳಿವೆಲ್ಲ ನಾಳೆಯೊಳಗೆ
ಕಣ್ಣಿನ ನೆಳಲೆಲ್ಲ ಬಿಂಬದೊಳಗೆ!..
ವಿಭ್ರಮ ಪರ್ವಕೆ
ಸುರಿವ ಸೋನೆಯ ಮಳೆ
ಸಂಭ್ರಮ ಸೆಳವಿಗೆ
ಬಿರಿವ ಬರೆಯುವ ನಾಳೆ
ಮಣ್ಣಿನ ಮುನಿಸೆಲ್ಲ ಪ್ರೀತಿಯೊಳಗೆ
ಬಾಳಿನ ಮುಗಿಲೆಲ್ಲ ನೀರಿನೊಸಗೆ!...
ಅಂಬರ ಬೆದರಿದೆ
ಧ್ವನಿಸಿದೆ ಝೇಂಕಾರದ ಕೊರಳು
ಭ್ರಮರವು ಹೊರಳಿದೆ
ಅರಳಿಸಿ ಅನುಬಂಧದ ಮುಗುಳು!
ಸಂಬಂಧ ಬಿಂದುಗಳು ನೂಲಿನೊಳಗೆ
ಬೆಸೆದು ನಿಂತಿದೆ ತಾನೇ ಪ್ರೀತಿ ಮಳಿಗೆ!!...
~‘ಶ್ರೀ’
ತಲಗೇರಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ