"ಹಂಗು.."

         "ಹಂಗು.."

ಮುಗಿಲ ಹಕ್ಕಿ ಹಾರೋ ಪಥದಿ
ಸರಿದು ನಿಲುವ ಬಾನ ಗಾಳಿ..
ಕಡಲು ಉಕ್ಕಿ ಅಲೆವ ಕ್ಷಣದಿ
ಎದೆಯ ಕೊಡುವ ಮರಳ ಕೇಳಿ..

ಚೆದುರಿರುವ ಅಕ್ಷರವ ಕರೆದು
ನಡೆಯುವುದು ಪದಗಳಾ ಅಧಿವೇಶನ..
ಹವೆಯೊಳಗೆ ಪರಿಮಳವ ಹೊಸೆದು
ಕರೆಯುವುದು ಭ್ರಮರವಾ ಸುಮದ ಗಾನ..

ಕಳೆದಿರುವ ಪ್ರಾಯವನು ನೆನೆದು
ಬಯಸುವುದು ಆ ಬಾನು ಚಂದ್ರಮನ ಸಂಗ..
ಅಲೆಯುತಿಹ ಕಾಲುಗಳ ಸೆಳೆದು
ಕೆಣಕುವುದು ಸತ್ತ್ವವನು ಮೃಗಜಲದ ವೇಗ..

ಬೊಗಸೆ ಹಸಿವಿಗೆ ಇಡಲು ಮಧ್ಯಂತರ
ಶೃತಿಲಯದ ಸಲ್ಲಾಪ ಕಂಪಿಸಲು ತಂತು..
ಮೊಗದ ಗೆರೆಗಳ ನಡುವೆ ಆನಂತರ
ಋತು ಬರೆವ ಸರದಿ ಕವಲುಗಳ ಕುರಿತು...

ಯಾರು ತಂಗುವರೋ ನನ್ನೆದೆಯ ಜಗುಲಿಯಲಿ
ಅಂತರಂಗದ ಅಗಳಿಗೆ ಬೇಕೇನು ಕೀಲಿ!..
ಸೂರ ಹಂಗಿಗೇಕೋ ಬಣ್ಣಗಳ ವೇಷಾವಳಿ
ನಿಲಬಹುದೇ ನಾನು ನನ್ನದೇ ನೆರಳಿನಲಿ!!..

                                                  ~`ಶ್ರೀ'
                                                      ತಲಗೇರಿ