ಇಬ್ಬನಿ.....

ಇಬ್ಬನಿ...ಕರಿಯ ಮುಗಿಲಿನ ಕ೦ಬನಿ...ಸುಡುವ ಬಿಸಿಲ ಬೇಗೆಗೆ,ಎ೦ದೂ ಮುಗಿಯದ ವಿರಹ ವೇದನೆಗೆ..ಮುಗಿಲ ಕೆನ್ನೆಯ ಮೇಲಿ೦ದ ಜಾರಿದ ಹನಿ ಇರಬಹುದೇ?...ಮರಳಿ ಸೇರದ ತನ್ನಿನಿಯೆಗೆ ಬಾನಿನ ಮುತ್ತಿನ ಸ೦ದೇಶವು ಇರಬಹುದೇ?..ಕಾವೇರಿದ ಭೂರಮೆಗೆ ತ೦ಪನು ನೀಡುವ ಪರಿಯಿರಬಹುದೇ?...ಹಸಿರು ಬೊಗಸೆಗೆ ಬೀಳುತ ದಾಹವ ತಣಿಸುವ ಯೋಚನೆ ಇರಬಹುದೇ?...ಧರಣಿಯ ಸಿ೦ಗರಿಸಲು ಅಳುತಿದೆ ಮುಗಿಲು....ಕುಸಿಯಲು ಕೊಡದೇ,ಸಾ೦ತ್ವನ ನೀಡಲು ಬೇಕಿದೆ ಹೆಗಲು...ಮಡಿಲು....!~‘ಶ್ರೀ ತಲಗೇರಿ

ಶುಕ್ರವಾರ, ಏಪ್ರಿಲ್ 17, 2015

"ಸಮಯ"...

"ಸಮಯ"...

ಬದುವೆಲ್ಲಾ ಹದವಾಗಿ ಕಾದಿಹುದು ಮೃದುವ
ಅತ್ತ ತಂಪಿನ ಮಾಡು ಮೂಡುವ ಭ್ರಮೆಯಲಿ..
ನದಿಯೆಲ್ಲಾ ಕಡಲನ್ನು ಸೇರುವಾ ಸ್ವರವ
ಮತ್ತೆ ಇಂಪಿನ ಒನಪು ಮಾಡಿತು ಹೊಸತಿನಲಿ..

ನಿಶೆಯ ಪ್ರಸವದಲಿ ಚಂದ್ರನೆನ್ನುವ ಮಧುವು
ಹವೆಯೊಳಗೆ ಹಂಬಲದಿ ಅಲೆದಿಹುದು ಮುಗಿಲು..
ಸರಿಸಿ ತೆರೆದೀತೇ ಅಗಳಿಯನು ಕದವು
ತುಂಬೀತೇ ಮತ್ತೊಮ್ಮೆ ಖಾಲಿಯಾಗಿಹ ಬಿಸಿಲು..

ಗಾಳಿಯಾ ಗಡಿಬಿಡಿ ಋಣದ ಮಾತು
ಕಾಯದೇ ಉದುರಿತು ಕಾಲಕೆ ಹಳತು..
ಭೂಮಿಯಾ ಬಸಿರಿನ ಜೋಗುಳ ಸೆಳೆತ
ಕಾಮದ ಸಮಯವ ಕೇಳದೇ ಕಸಿಯಿತು..

ರೆಕ್ಕೆಯ ಬಿಚ್ಚಿತು ಬೆಳಕಿನ ಹಕ್ಕಿ
ಹಾದಿಯ ಮೋಹದ ಮಂಜನು ಕರಗಿಸಿ..
ಪಕ್ಕದ ಪಯಣಿಗ ಎಲೆಗಳ ಹೆಕ್ಕಿ
ಜೋಳಿಗೆ ತುಂಬಿಹ ಆಸೆಯ ಪೋಣಿಸಿ..

ಹರಿದ ಚೀಲದ ಮೈಗೆ,ತೇಪೆಗಳ ಉಪಚಾರ
ಬೊಗಸೆಯಲಿ ಉಳಿದಿಹುದು ಬರಿಯ ಮಣ್ಣಿನ ವಾಸನೆ..
ಬಿರಿದ ಹೂಗಳು ಕೈಗೆ,ಎಟುಕದಾ ಪರಿವಾರ
ಕಿಸೆಯೊಳಗೆ,ಕದಲುತಿದೆ ಗಡಿಯಾರದಾ ಮುಳ್ಳು ತಂತಾನೇ..

~‘ಶ್ರೀ’
ತಲಗೇರಿ