ಇಬ್ಬನಿ.....

ಇಬ್ಬನಿ...ಕರಿಯ ಮುಗಿಲಿನ ಕ೦ಬನಿ...ಸುಡುವ ಬಿಸಿಲ ಬೇಗೆಗೆ,ಎ೦ದೂ ಮುಗಿಯದ ವಿರಹ ವೇದನೆಗೆ..ಮುಗಿಲ ಕೆನ್ನೆಯ ಮೇಲಿ೦ದ ಜಾರಿದ ಹನಿ ಇರಬಹುದೇ?...ಮರಳಿ ಸೇರದ ತನ್ನಿನಿಯೆಗೆ ಬಾನಿನ ಮುತ್ತಿನ ಸ೦ದೇಶವು ಇರಬಹುದೇ?..ಕಾವೇರಿದ ಭೂರಮೆಗೆ ತ೦ಪನು ನೀಡುವ ಪರಿಯಿರಬಹುದೇ?...ಹಸಿರು ಬೊಗಸೆಗೆ ಬೀಳುತ ದಾಹವ ತಣಿಸುವ ಯೋಚನೆ ಇರಬಹುದೇ?...ಧರಣಿಯ ಸಿ೦ಗರಿಸಲು ಅಳುತಿದೆ ಮುಗಿಲು....ಕುಸಿಯಲು ಕೊಡದೇ,ಸಾ೦ತ್ವನ ನೀಡಲು ಬೇಕಿದೆ ಹೆಗಲು...ಮಡಿಲು....!~‘ಶ್ರೀ ತಲಗೇರಿ

ಭಾನುವಾರ, ಫೆಬ್ರವರಿ 22, 2015

"ಭಿತ್ತಿ ಮೀರಿ"....

"ಭಿತ್ತಿ ಮೀರಿ"....

ಇಟ್ಟಿಗೆಯ ಪೇರಿಸಿಡಲು
ಭಿನ್ನವಾಗುವ ಹಂಬಲಕೆ
ಮೊದಲ ಮಜಲು...
ಎಲ್ಲ ದಿಕ್ಕಲೂ
ಕಲ್ಲ ಸಾಲಿಗೆ
ತಳವ ಕೊಡಲು
ಮನೆಯ ಮಧ್ಯವೇ
ಹುಟ್ಟುತಿಹವು
ಮತ್ತೆ ಗೋಡೆಗಳು...

ಕತ್ತಲೆಯ ಸಂಗ್ರಹಕೆ
ಬೆಳಕು ದಾಟದ ಹೊದಿಕೆ...
ತಪ್ತ ಬಯಕೆಯ ಝಳಕೆ
ಸಂದು ಸಂದಿಗೂ
ಬಿಸಿಯು ಸೋಕಲು
ಸದ್ದು ಮಾಡೀತೇ ಇನ್ನು
ಸ್ತಬ್ಧ ಕುರ್ಚಿಯಾ ಕೀಲು...

ಮುಗಿಲೆದೆಯ ಬಿಗಿಯು
ನೆರಿಗೆಯನು ಕರಗಿಸಲು..
ತೆರೆ ಕದವ,ಮಳೆ ಹನಿಯ
ಬೊಗಸೆಯಲಿ ಹಿಡಿದುಕೊಳಲು..
ಗರಿಗೆದರಿ ಹಬ್ಬಿಕೊಳಲಿ ಹಕ್ಕಿ
ಇಣುಕಿರಲು ಎಳೆಬಿಸಿಲು...
ತುಂಬಿಕೊಳಲಿ ಗೋಡೆಗಳ ಮೀರಿ
ರಂಗು ರಂಗಿನ ಬೆಳಕಿನೆಸಳು...

~`ಶ್ರೀ'
ತಲಗೇರಿ