ಶನಿವಾರ, ಮಾರ್ಚ್ 21, 2015

"ಗಮ್ಯ"...

        "ಗಮ್ಯ"...

ಮುಗಿಲ ತೂಕಕೆ ಮೂಲ
ಒಳಹನಿಯ ಕೂಟವೋ...
ಮೈ ತುಂಬ ಹರಿವ
ಗಾಳಿಯಲೆಗಳ ಮಾಟವೋ...
ಬೊಗಸೆ ಚಾಚುವ ಇಳೆಯ
ಕೈ ಗೆರೆಗಳಾ ಸೆಳೆತವೋ...
ಕರಗುವುದು ಘನತಿಮಿರ
ಕಳೆಯುತ್ತ ಎದೆಭಾರ...

ಶಶಿಯ ತೊಗಲಿಂದ ಬಸಿವ
ತಂಗದಿರು ಯಾವ ಮಾಪನ..
ಉಬ್ಬು ತಗ್ಗುಗಳ ಇದಿರು
ಪ್ರತಿಫಲಿಸಿಹ ತನಗೊದಗಿದ ಬಿಸಿಲನ್ನ..
ನೆರೆಮನೆಯ ಒಳಮನೆಯು
ಕನಸುಗಳ ಹೆಕ್ಕಿ ಇಡಲೆಂದು..
ಅದುಮಿಟ್ಟ ಒಳದನಿಯು
ನವಿರಾಗಿ ನಗಲೆಂದು...

ಕೂಡದಿರು ಕಡಲನ್ನ
ಹೆಸರಿರದ ತೊರೆಯಂತೆ..
ಎದೆಯೊಳಗೆ ಬದು ಕಟ್ಟಿ
ಬದಲಿಸು ಹರಿವನ್ನ..
ಚಿಗಿತು ಬೀಗಲಿ ದಡವು
ತುತ್ತು ಕಾಣಲಿ ಮಗುವು..
ಚಾಚಿಕೊಳಲಿ ಕವಲು ಕವಲಲಿ
ದೂರ ದೂರದ ಊರಲಿ...

                          ~‘ಶ್ರೀ’
                             ತಲಗೇರಿ

2 ಕಾಮೆಂಟ್‌ಗಳು: