"ಸಾಲು ಬಣ್ಣಗಳ ಸೇತು..."

  "ಸಾಲು ಬಣ್ಣಗಳ ಸೇತು..."

ಕಣ್ಣುರೆಪ್ಪೆಯ ತುದಿಗಳಲ್ಲಿ
ಸಾಲು ಬಣ್ಣಗಳ ತಂಗುದಾಣ..
ನಿನ್ನೆ ಕಟ್ಟಿದ ನೆನಪಿನಲ್ಲಿ
ಎಲ್ಲೋ ಇಣುಕಿದೆ ಒಂದು ಮೌನ..

ನಿನ್ನ ಬಯಲಿನ ಕಾಲುದಾರಿ
ಎದೆಯ ತೆರೆದಿದೆ ನನ್ನ ಸಲುವೆ..
ತಂಪು ಬೆಳಕಿನ ಬೀಜ ಬೀರಿ
ಕಂಪು ಸೂಸಲು ಮುಂದೆ ನಡೆವೆ..

ನಿನ್ನ ಕಡಲಿನ ಹಾಯಿದೋಣಿ
ಒಲವ ಅಲೆಯಲಿ ನಾ ಕಂತಲೇ..
ನೀನೋ ತಿಳಿಯದ ದಿವ್ಯ ಮೌನಿ
ನಿನ್ನ ಗರ್ಭದಿ ನಾ ಬೆರೆಯಲೇ..

ನಿನ್ನ ಒಳಗಿನ ಸಂಜೆಗಳಲಿ
ಮಿಲನ ರಾಗದ ಮಳೆಯಬಿಲ್ಲು
ಮತ್ತೆ ಕಟ್ಟುವ ಸೇತುಗಳಲಿ
ನಿನದೇ ಮೊರೆತ ತುಂಬಿ ಒಡಲು..

ಬಿದಿರು ಕೊಳಲಾದೀತು
ನಿನ್ನ ಶ್ರುತಿಯ ತೊದಲಿರಲು..
ಒಣಮರವು ನೆರಳಾದೀತು
ಅದರೆದೆಯು ತಾ ತೆರೆದಿರಲು..

                        ~‘ಶ್ರೀ’
                          ತಲಗೇರಿ