ಶನಿವಾರ, ಜನವರಿ 4, 2014

"ರದ್ದಿ ಕಾಗದ"...

       "ರದ್ದಿ ಕಾಗದ"...

ತಾಜಾ ಹಾಳೆಗಳ ನಡುವೆ
ರದ್ದಿ ಕಾಗದವು ನಾನು...
ಹಗಲ ಹೊಳಪಿನ ನಡುವೆ
ಇದ್ದರೂ ಇರದ ಬದುಕೆನಲೇನು..

ಪುಟ್ಟ ಕೈಗಳಲಿ ದೋಣಿಯಾಗಿ
ಸಲಿಲದೊಡನೆ ಸಲಿಗೆಯೊಡನೆ ತೇಲಿಸಾಗಿ
ಮುಟ್ಟೋ ಸುಳಿಗಳಲಿ ದಿಟ್ಟವಾಗಿ
ಸೇರಿಕೊಳಲೇ ದೂರಸಾಗರ ಒಂಟಿಯಾಗಿ..

ಚುಕ್ಕಿ ದಿರಿಸ ತೊಟ್ಟ ಪಟವಾಗಿ
ಗಾಳಿಯೊಡನೆ ನಿತ್ಯ ಬೆಳೆವ ಹಟವಾಗಿ
ಹಕ್ಕಿಯುಸಿರು ಬೆರೆವ ಎದೆಯಾಗಿ
ತಬ್ಬಿಕೊಳಲೇ ಮುಗಿಲ ಮಡಿಲ ಮುಗ್ಧವಾಗಿ..

ಹಸಿದ ಉದರದ ತಂಪಿಗಾಗಿ
ತಂತಿ ಮೀಟುತ,ಸದ್ದಿನೊಡನೆ ಏಕವಾಗಿ
ಅಲೆವ ಜೋಗಿಯ ಸಲುವಾಗಿ
ಅನ್ನ ಹಿಡಿಯಲೇ ತುತ್ತಿನೂಟದ ಎಲೆಯಾಗಿ..

ರದ್ದಿ ಕಾಗದವೇ ನಾ ಆದರೇನು,..
ಚೆಲುವು ನಾಚಬೇಕು ನನ್ನ ಇದಿರು..
ಬೀಡುಬಿಟ್ಟ ಮೌನ ತಾಕದೇನು,..
ಕನಸ ತಟದ ಹೊಸತು ಕದಿರು...!

                          ~‘ಶ್ರೀ’
                            ತಲಗೇರಿ

1 ಕಾಮೆಂಟ್‌: