ಇಬ್ಬನಿ.....

ಇಬ್ಬನಿ...ಕರಿಯ ಮುಗಿಲಿನ ಕ೦ಬನಿ...ಸುಡುವ ಬಿಸಿಲ ಬೇಗೆಗೆ,ಎ೦ದೂ ಮುಗಿಯದ ವಿರಹ ವೇದನೆಗೆ..ಮುಗಿಲ ಕೆನ್ನೆಯ ಮೇಲಿ೦ದ ಜಾರಿದ ಹನಿ ಇರಬಹುದೇ?...ಮರಳಿ ಸೇರದ ತನ್ನಿನಿಯೆಗೆ ಬಾನಿನ ಮುತ್ತಿನ ಸ೦ದೇಶವು ಇರಬಹುದೇ?..ಕಾವೇರಿದ ಭೂರಮೆಗೆ ತ೦ಪನು ನೀಡುವ ಪರಿಯಿರಬಹುದೇ?...ಹಸಿರು ಬೊಗಸೆಗೆ ಬೀಳುತ ದಾಹವ ತಣಿಸುವ ಯೋಚನೆ ಇರಬಹುದೇ?...ಧರಣಿಯ ಸಿ೦ಗರಿಸಲು ಅಳುತಿದೆ ಮುಗಿಲು....ಕುಸಿಯಲು ಕೊಡದೇ,ಸಾ೦ತ್ವನ ನೀಡಲು ಬೇಕಿದೆ ಹೆಗಲು...ಮಡಿಲು....!~‘ಶ್ರೀ ತಲಗೇರಿ

ಭಾನುವಾರ, ಸೆಪ್ಟೆಂಬರ್ 22, 2013

ತೊರೆಯದಿರು "ನೀರೇ"...

ತೊರೆಯದಿರು "ನೀರೇ"...

ಕಿರುತೊರೆಯ ಕಲಕಲ ನಾದ
ಕಲ್ಲೆದೆಯ ಗರ್ಭದಲೂ
ತಂತಾನೇ ಚಿಗುರು ಸಂಭ್ರಮ..
ನೀ ತೊರೆಯದಿರು ‘ನೀರೇ’..
ಹರಿಯುತಿಹೆ ಈ ದಾರಿಯಲಿ
ಅದಕೂ ನೀ ತಾನೇ ರೂವಾರಿ..

ತಿಳಿದಿಲ್ಲ ನಿನ್ನ ಹುಟ್ಟಿನಾ ಗುಟ್ಟು
ಎಲ್ಲಿ ಬೆರೆಯುವುದೋ ಕೊನೆಗೆ
ಆ ನಿನ್ನ ಕೊನೆಯ ತೊಟ್ಟು..
ತುಂಬಿಹುದು ಮಾತ್ರ ಆ ತಂಪು ಸ್ಪರ್ಶ
ಜೀವಜೀವದ ತುಂಬ ತುಂಬ
ಜಿನುಗುತಿದೆ ಪ್ರೀತಿಯಾ ಅಂಶ
ನೀನೇನೇ ಅಂತರಂಗದಾ ಉತ್ಕರ್ಷ..

ಗುಪ್ತಗಾಮಿನಿಯೋ,ಸುಪ್ತ ಇನಿದನಿಯೋ
ಅಭಿಸರಣ ಸನ್ನಿಹಿತ ಭಾಮಿನಿಯೋ..
ಕಾಣದ ಒಡಲ ಬಂಧದ ಕವಲೋ
ಧ್ಯಾನದ ದಿವ್ಯ ತೇಜದ ಲಹರಿಯೋ...
ನೀ ತೊರೆಯದಿರು ನೀರೇ..
ಈ ತೊರೆಯ...ಸುಪ್ತ ತೆರೆತೆರೆಯ...

~‘ಶ್ರೀ’
ತಲಗೇರಿ