"ಅಮ್ಮ"...

ಲಾಲಿ ಹಾಡಿನ ಇಂಪು ಜೀವದನಿ
ಬಿದಿಗೆ ಚಂದ್ರನಂದಕೆ ಅರಗಿಣಿ
ಎದೆತುಂಬ ತಿಳಿನೀರ ಕಡಲೆ
ಎಳನೀರ ತಂಪಿನಾ ಮೃದು ಮಡಿಲೆ..

ನಿನ್ನೆಗಳ ಸಂಗಾತಿ ನಾಳೆಗಳ ಸಂಪ್ರೀತಿ
ಈ ಕ್ಷಣದ ಹಸಿ ಉಸಿರು ನೀನಮ್ಮ..
ಸೋಲುವುದೇ ಸುಖವು ಬಲುಚೆಂದ ಸಂಗತಿ
ಹಣೆಗೊಂದು ಮುತ್ತಿಟ್ಟು ನೀ ಸಂತೈಸುವಾಗ..

ತೊದಲಿನಲೂ ಮುಗುಧತೆಯ ಕಾಣೋ
ಮೊದಲ ನಿಜ ಮನಸು ನಿನದು..
ಹಸಿವಿನಲೂ ನನ್ನ ನಗುವೆ ಸಾಕೆನ್ನೋ
ತ್ಯಾಗಭಾವ ಸಂಗಮ ಈ ಬಂಧು..

ತಂತಾನೇ ಮಿಡಿವ ಜೀವತಂತಿ
ನನ್ನೆದೆಯ ಸಂಭ್ರಮದ ಭಾವ ಮೀಟಿ
ಈ ಜಗದ ಚಿರ ಸೌಂದರ್ಯವತಿ..
ನೀ ತಾನೇ ನನ್ನೆಲ್ಲ ಕನಸುಗಳ ಮೇಟಿ..

ಜಗದೆಲ್ಲ ಕಾವ್ಯಗಳ ನಿಜ ನಾಯಕಿ
ಸೋಜಿಗದ ಜೀವನದ ಸಂಚಾಲಕಿ..
ಬೆರೆಯಬೇಕು ನಾ ನಿನ್ನ ಪ್ರೀತಿ ಕಡಲಲಿ
ಮತ್ತೆಂದೂ ಒಲವು ನೂರು ಕವಲಾಗದಂತೆ...

                                ~‘ಶ್ರೀ’
                                  ತಲಗೇರಿ