"ಜೀವಗಂಗೆ"...

      "ಜೀವಗಂಗೆ"...

ಎದೆಯ ಪದರಿನಲ್ಲಿ ಸ್ವಪ್ನ ಚಿಗುರಿದ ಹಾಗೆ
ಮೊದಲ ಸಂಜೆಯಲ್ಲೇ ಬೆಳ್ಳಕ್ಕಿಗಳ ದಿಬ್ಬಣದ ಬೆಡಗು
ಸರಳವಾಗಿ ಬಿದಿರಿನಲ್ಲಿ ಸ್ವರವು ಸೃಜಿಸಿದ ಹಾಗೆ
ನನ್ನುಸಿರ ಕಂಪಿನಲೂ ನಿನ್ನ ಹೆಸರ ಇಂಪು ಕೂಗು

ಮಳೆಬಿಲ್ಲಿಗೆಲ್ಲ ಸೊಬಗು ಕೊಟ್ಟ ಬಣ್ಣ ನೀನು
ಆಗಲೇ ನಾ,ನಿನ್ನ ತುಂಬಿಕೊಂಡ ಆ ಚೂರು ಬಾನು
ಗಾಳಿಗೆಲ್ಲ ಬಾಗಿ ನುಲಿವ ಚಿಗುರು ಹುಲ್ಲು ನೀನು
ಒರಗು ಬಾ,ಎದೆಯ ಕೊಡಲೇ ಭೂಮಿಯಂತೆ ನಾನು..

ಹರಡಿಕೊಳುವೆ ಹೂವಿನಂತೆ ನಿನ್ನ ಹಾದಿಯುದ್ದ
ಸೋಕಿಹೋಗು ಕೊಂಚಕೊಂಚವೇ ಮೃದುಲ ಪಾದ..
ಹಾಗೇ ಮೆಲ್ಲ ಹಂಚಿಹೋಗು ನನಗೂ ಸ್ವಲ್ಪ ರಂಗು
ಮತ್ತೆ ಮತ್ತೆ ತುಂಬಿಕೊಳಲಿ ಕ್ಷಣವೂ ನಿನದೇ ಗುಂಗು..

ಸರಣಿ ಸ್ವಪ್ನಗಳ ಬೇಲಿಯುದ್ದ ಸಾಲುದೀಪ
ಪರಿಚಯಿಸು ಅವಕೂ ನಾನು ತುಂಬ ಪ್ರಾಮಾಣಿಕ..
ನಾನಿಡಲೇ ಒಂದೆರಡು ನಾಜೂಕು ಚುಕ್ಕಿಗಳ
ಸಣ್ಣ ಜೋಳಿಗೆಯ ಹೊತ್ತ ನಾನೊಬ್ಬ ಪ್ರಯಾಣಿಕ..

ಕಾಡದಿರು ನೀನು ಬಿಸಿಲುಗುದುರೆಯ ಹಾಗೆ
ಮರಳುಗಾಡಲು ನೀನೇ ಭರವಸೆಯ ಜೀವಗಂಗೆ!..
ಕ್ಷಣವೆಷ್ಟೇ ಕಳೆದರೂ ತೆರೆದಿಹುದು ಬಾಗಿಲು
ಸುಪ್ತವಾಗಿ ಸೇರು ಬಾ ನಿನಗೆಂದೇ ಕಾದಿರುವ ಒಡಲು..


                                 ~‘ಶ್ರೀ’
                                   ತಲಗೇರಿ