"ಹೆಜ್ಜೆ"...

ಕೆಲವೊಂದು ಗಿಡಗಳು
ನಡೆದಾಡುತ್ತವೆ ಗಾಳಿಯ ಸಂಗಡ;
ತಮ್ಮ ತಮ್ಮ ಪರಿಧಿಯಲ್ಲಿ
ಸೌರಭದ ಮೂಲಕ..

ಇನ್ನು ಕೆಲವಷ್ಟು
ಪರಾಗದ ರೂಪದಲ್ಲಿ
ಚಿಟ್ಟೆಗಳ ಕಾಲಿಗಂಟಿಕೊಂಡು
ಇನ್ನೊಂದು ಹೂವಿನ
ಎದೆ ಸೇರುತ್ತವೆ..

ಈ ನಡಿಗೆ ಕೇವಲ
ಚಿಟ್ಟೆಯ ಮೇಲಿನ
ವ್ಯಾಮೋಹದಿಂದಲ್ಲ;
ಬದಲಾಗಿ,
ನಾಳೆಗಳ ಕಟ್ಟುವಿಕೆಗೆ!
ಒಲವ ಜೇನ ಹಸ್ತಾಂತರಕೆ
ಚಿಟ್ಟೆ ಇಲ್ಲಿ ರಾಯಭಾರಿ..

ಕಾಯೊಂದು ಹುಟ್ಟಿಕೊಳ್ಳುತ್ತದೆ
ಗುರುತಾಗಿ;
ಕಡೆದಾಗ ಮೂಡಿಬರುವ
ನವನೀತದಂತೆ..
ವ್ಯತ್ಯಾಸವಿಷ್ಟೆ;
ನಾವೂ ನೀವೂ ನಡೆಯುತ್ತೇವೆ
ಕೇವಲ ಹೆಜ್ಜೆ ಮಾತ್ರ ಇರುತ್ತದೆ;
ಗುರುತಿಲ್ಲದಂತೆ!...

                              ~‘ಶ್ರೀ’
                                  ತಲಗೇರಿ